Nantu a piaghja luminosa
Di mulizzu suminata
Ci hè tanta ghjente accatastata
Nantu a rena dulurosa
Vervogna à tè chì vendi a terra (bis)
Quì ind'è u strangeru hà cumpratu
Ci hè una casa vituperia
Chì sputa nantu a miseria
Dì u to locu abbandunatu
Vervogna à tè chì vendi a terra (bis)
A rimignia in campusantu
In trà mesu à e tombe s'hè stesa
E di u tempu l'offesa
Mena u sguardu ogni tantu
Vervogna à tè chì vendi a terra (bis)
In quelle campagne brusgiate
Più mancu un cane ùn abbaghja
Magra trista la ghjandaghja
Canta e stagione malate
Vervogna à tè chì vendi a terra (bis)
E l'estate ti vede fieru
Sbarcà à mezu à e to ruine
Cù e manere parrigine
A la to terra strangeru
Vervogna à tè chì vendi a terra (bis)
Un tornà più o traditore
Chì si ride di e mio pene
U sangue di le to vene
Di u soldu hà lu colore
Vervogna à tè chì vendi a terra
Vervogna à tè chì vendi a terra
Vervogna à tè.
G.P. Poletti