A tè la Corsica regina
A ella tù
è lu pocu di sta rima
A cio chi fù
A tè u ventu chi scuzzula
L'alburoni intimuriti
spazzendu in terra la pula
di li to passi smariti
A tè l'abbracciu di sta terra
à i purtelli di a notte
quandu si tace ogni guerra
è s'aprenu le centu porte
E centu porte di l'avvene
i centu mesi di u ritornu
cio chi fughje ch'omu tene
cù a sperenza chi un ghjornu...
A noi d'un lacà travià
è d'un pienghje à mille voci
u tempu hè fiume ùn ci vole à fà
ch'elle s'ingorghinu le foci.
A tè la Corsica regina...
P. Croce - GHJM. Pesce